ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានឆ្លើយតបនូវមតិរិះគន់មួយចំនួនដែលថាឱ្យរាជរដ្ឋាភិបាលពុករលួយ ដោយស៊ីដាច់លុយពីជំនួយបរទេស ជាពិសេសជំនួយជប៉ុនដែលផ្តល់ឱ្យកម្ពុជាក្នុងការសាងសង់ហេដ្ឋារចនាសម្ព័ន្ធ និងអភិវឌ្ឍសង្គមនានា។
ថ្លែងក្នុងពិធីគំរប់ខួប ១១ឆ្នាំ រោងចក្រមីនេបៀ នៅព្រឹកថ្ងៃទី១ ខែធ្នូ ឆ្នាំ២០២២ នៅតំបន់សេដ្ឋកិច្ចពិសេសភ្នំពេញ សម្តេចតេជោ ហ៊ុន សែន បាននិយាយដូច្នេះថា៖ «អ្នកខ្លះថាយើងហ្នឹងស៊ីលុយជំនួយ ប៉ុន្តែសុំទៅសួរអគ្គរាជទូតជប៉ុនទៅ ធ្វើផ្លូវជាតិលេខ៥ អស់ប៉ុន្មាន អីប៉ុន្មាន គឺខ្ញុំអត់ដឹងទេ។ ស្ពានប៉ុន្មានដែលជប៉ុនធ្វើហ្នឹង ខ្ញុំទៅតែបើកការដ្ឋាន និងដាក់ឱ្យប្រើប្រាស់ ត្រង់ថាចាយប៉ុន្មានខ្ញុំអត់ដឹងទេ»។
ក្នុងន័យនេះសម្តេចនាយករដ្ឋមន្ត្រីកម្ពុជាបានអះអាងថា ជប៉ុនគឺជាប្រទេសដែលមានការគិតគូរបានល្អិតល្អន់ចំពោះការផ្តល់ជំនួយមកកម្ពុជា។ សម្តេចបានថ្លែងថា៖«អតីតរដ្ឋមន្ត្រីការបរទេសជប៉ុនម្នាក់តាំងពីទសវត្ស៩០ គាត់ថា ស្អប់ណាស់អាមនុស្សដែលមិនដឹងថាជប៉ុនចាយលុយរបៀបម៉េច?»៕
